Oil palm leh Mizoram

Assembly Budget Session kalpui mekah Chief Minister chuan oil palm chìn belh vak vak zawngin Mizoram sorkar kal a tum tawh loh thu a sawi a; sorkar laipuiin tél indaih lohna avangin oil palm chìn tharthawh leh mah se, "Anni rawn tih vang ngawtin oil palm chìn belh vak vak zawngin kal kan tum lo. A chíng tawh sate tana a phurh chhuahna kawng siam leh a sàwrna a hnai thei anga dah zawnga kal kan tum," a ti.

Tlemlai deuh khan Agriculture depart­ment buat­saihin oil palm chin ṭulna leh ṭhatna an sawiho a, Oil palm chu kum 25 chhung loneitute'n kum tin lakluh an neih theihna tur a nih thu an sawi. Oil palm chu tel (hriak) siamtu a nih mai piah lamah boruak chhia hip raltu a nih thu an sawi a; buh, fu leh balhlate ai pawha tui mamawh tlem zawk a ni, tiin oil palm chìn lam an âwn deuh dâwn niin a lang hman.

Tunah erawh Chief Minister berin chiang taka sawiin sorkar laipui lamin hma an lâk thar vang ngawtin Mizoramah oil palm chìn vak an tum loh thu a sawi chiang ta. Pawl hrang hrang - ASEP, BIOCONE leh Conversation Mizoram-te chuan oil palm chìn kalpui lo turin Chief Minister hi an lo ngen tawh nghe nghe a ni.

India sorkar chuan oil palm hi a lian thama kalpui turin National Mission on Edible Oil-Oil Palm (NMEO-OP) a din a, cheng vaibelchhe 11,040 vel zet a dah. India hmar chhakah oil palm hi nasa taka kalpui a tum a, Mizoramah pawh ram hectre 2,000-a oil palm ching turin sorkar laipui lamin target an rawn siam niin media lamah tarlan a lo ni tawh.

Sorkar laipuiin project lian tham leh sum tam zawk nen oil palm chìn kalpui tum mah se, a nghawng ṭha lo awm theite avangin Mizoramah chuan oil palm chin vak vak tum a nih tawh loh thu Chief Minister-in a sawi chiang tawh a, thil läwmawm tak a ni.