Ṭanpuitu kan mamawh

USA-a chám mek Health minister chuan tun hnai khan Washington DC-ah UNAIDS hotute a kâwm a, HIV/AIDS lama Mizoram dinhmun tlangpui sawiin, Mizoram harsatnate hriatthiampuia uluk leh rintlak lehzuala UNAIDS-te'n kawng hrang hranga an thiamna leh hmanrua neih ang ang leh a ṭul dan azira sum leh technical support lam thleng pawha hmalakpui turin a ngen. UNAIDS hotute chuan, Health Minister thil thlente chu an ngaih pawimawh thu leh a theih ang angin Mizoram tan theihtawp chhuah an tum thu an sawi.

HIV/AIDS lama Mizoram dinhmun dik tak hi kan chhut duh chuan, kan dinhmun hi a ṭha loin a hlauthawnawm tawh takzet a ni. Tun ang zela HIV/AIDS hi a darh chuan, harsatna dangin min tlakbuak lo mah se kan hmalam hun hi a êng lo a, theihtawp chhuaha ṭang tlanga kan do a ngai a ni. Hun rei tak chhung chu tute emaw he lama thawktu bikte do turah kan dah deuh a, chumi hnuah tlawmngai pawl hrang hrang an harh a, loh theih lohnain sorkar a beng harh a, kohhran pawh a awl thei ta lo. 

HIV/AIDS doa a lian thama hma la tak tak tur hian kan sorkar sum neihin a tlin lo a, chu chu kan pawm mai a ngai. Hei vang tak hian ṭanpuitu kan mamawh a, chumi kawnga Health mi­nister-in USA thleng thlenga ke a pen hi a lawmawm khawp mai. Health minister hian HIV/AIDS-a kan ram dinhmun hi khawvel hmun dangah a timualphoin a tlangzarh angin ngai lo ila, kan dinhmun dik tak hi a chhiat tawh avangin ṭanpui theitu a zawng a, a zawnna a hla deuh a ni mai - UNAIDS lam hian a takin min rawn ṭanpui a, hma min lakpui tak tak dawn a nih phei chuan a lawmawm lehzual ang.