AYUSH lama hmasawnna

Union AYUSH Minister chu tun hnai khan Aizawlah lo zinin AYUSH hospital khum 50 awmna paruk leh khum 10 awmna tur pathum dinna tur lungphum a phum a; AYUSH Health & Wellness Centre unit 24 a hawng bawk. Minister chuan Mizoramah AYUSH hmasawnna ruhrel din belh zel tum a nih tur thu a sawi bawk.

AYUSH kan tih mai hi 'Ayurveda, Yoga, Naturopathy, Unani, Siddha, Sowa-Rigpa and Homoeopathy' tih lam tawi a ni a, tun hma aṭanga India rama tihdamna an kalpui dan chi sarih te chu he ministry hnuaiah hian kalpui a ni.

Sorkar laipui hian AYUSH hi a tuipuiin a huang pawh zauh zel a tum a, Mizoram pawhin a zar a zo chho ve zel dawn niin a lang.

Hetihlai hian AYUSH chung­chang hrim hrim hi hun rei tak chhung inhnialna lo awm tawh, tun thleng pawha inhnialna tawp thei lo a ni a; tihdamna kalpui dan pangngai nen a inan loh avang leh, a zirna leh a kalpui dan pawh a hran avangin an kawng tam takah an inpawm tawn lo a ni ber mai. Chutihlaiin hun rei tak chhung chu tuna AYUSH kan tih tak lam hawi hi kalpui a lo ni tawh a, mi tam takin an dampui bawk a ni.

Kum 2014-a BJP-in India rama sorkarna an lak hnu khan AYUSH lam hi uar zawka kalpui a ni a, ministry hranpa din a nih bakah sum tam zawk sorkarin a dah a, a ngai pawimawh hle bawk a ni. Tunah phei chuan thingtlang lam thlengin AYUSH kaltlanga tihdamna kalpui an tum a, chumi tur chuan hma pawh an la nasa hle a ni.

Mizoram pawhin AYUSH lamah hmasawnna tam tak a hmu chho ta a, sorkar laipui uar lam leh tuipui zawng a ni bawk a, sum tam zawkin a la rawn vur zel dawn a nih hmel.