Covid-19 leh ramri buaina zarah ILP khauh zawkin

Kolasib district magistrate chuan thuchhuah siamin, tun hnaiah Bairabi chhehvel Tlawng lui dungah leh khàn dang aṭangin state páwn lam mi, ILP nei lo leh dan loa Mizoram luh rûk tum an pung chhoa hriat a nih thu a tarlang a; dan loa Mizorama lutte chu Rs. 5,000 thleng chawitir theih an ni tih a puang. Bairabi Police Station leh Joint Village Task Force-te chu lo bawhzui turin a ngen bawk. 

Covid-19 hri leng avangin Mizorama hnathawk hnam dang mi tam tak chu an ramah an haw a, tun thlengin Mizoram hnathawk tura la kir lo leh kir duh tawh pawha kir thei lo eng emaw zat an awm. Hri len laiin ramri khân hrang hrangte mipui tlawmngai leh police lamin khauh takin an veng a, hei vang hian dan loa mihring lo lut tur bakah ruihhlo lo lut tur thlengin a tlem phah niin an sawi. Covid-19 hri len mek laiin Assam lamin ramriah buaina an rawn siam a, hei vang hian ramri hrula Mizo khuate'n ramri humhalh duhna lian zawk an neih phah bawk. 

Kan boruak tawn mek hi harsatna zawnga thlir chuan harsatna namen lo tiin a sawi theih ang. Chutih rual chuan he harsatna lo thleng hi kawng danga malsawmnaa chantir theih dan a awm bawk niin a lang - chu chu ILP khauh zawka kenkawh hi a ni. Mizoram pawn mi, tribal ni ve lote'n Mizoram an lo luh dawnin ILP an neih a ngai a, chumi pe chhuaktu chu Mizoram sorkar a ni a, pawn lam mi lo lutte'n ILP an neih leh neih loh endiktu pawh sorkar bawk a ni. Sorkar hi ILP chungchangah hian khauh zawk leh fimkhur zawka a kal duh a nih ngat chuan tun hi dik zawka ILP kalpui tharna hun remchang tak a ni. 

Zep thu a cheng lo, ILP nei loa Mizorama luh hi thil harsa a ni lo a, ILP lem hmang leh ILP nei lo hial pawhin hnam dangte hi Mizoramah an lo lut thei reng a, hei vang hian Mizoramah pawh vai kan tihte hi an pung chak hle a ni. Tun hnaiah hnam dang tam tak anmahni ramah an haw a, a lo lut thar leh turte hi chu ILP dik taka nei lo an lo luh tawh lohna turin sorkarin ruahmanna siam thei se. Covid-19 harsatna leh ramri buai hi chhawr ṭangkaiin ILP kalpui danah sorkar hi ṭang thar rawh se.