Vairengte-Sairang kawnga zangnadawmna

Vairengte-Sairang inkar kawngpui four lane-a siam tur chungchang chu Assembly House-ah sawi chhuah a ni a, eptu lamin zangnadawmna pek turah thil dik tawk lo awmah an ngai a; Land Revenue Minister chuan zangnadawmna chungchangah department an inrawlh loh thu a sawi.

Mizoramah hian project lian tham kalpui dawna harsatna thlen ṭhintu pakhat chu zangnadawmna pek chungchang hi a ni a, hei hi a zahthlak hle. A bikin kawngpui laih thar tur a awm hian buaina eng emaw a awm deuh ziah a, tun ṭuma Vairengte leh Sairang inkar kawngpui zauh turah pawh hian thil hi a kal tluang lo tih chu hai rual a ni lo.

He kawngpui siam thar tur chhehvelah hian Aizawla mi lian ṭhenkhatin tun hnaiah ram an nei tharin pass chi hrang hrang awm thei an buaipui niin titi a tam hle a, tlem lai deuh khan Kolasib lama Land Revenue & Settlement department office lam pawh an 'ṭul' hle niin sawi a awm bawk.

A ziakah chuan zangna­dawmna latu tur hi chu a fel deuh thlup ṭhin a; nimahsela a neitu hmasate hnen aṭanga tun hnai maia mi hausa zawkin an lei chhawn thawm te, hun khar tawh hnua pass siam thar leh titi leng vel hi a tak ni lo se a duhawm ngawt mai.

Ram neitu dik takte'n an zuara an hralh a nih chuan sawisel theih pawh a ni lo a; amaherawhchu kawng­puiin a tan tlang dan tur hre chiang saa pawisa nei zawkte'n an lei chhawn sak ṭhin te, 'investment' ang maia ngaia zangnadawmna lak leh tura ram lei chhawn vak vak te, a hre lawktute leh a pawisa neite inthuruala 'chiahpuam' ang maia zangna­dawmna kan buaipui fo mai hi chu a zialo ngawt mai.