State pawna Mizo sulhnu

Guwahati Mizo Welfare Association (GMWA) chuan thuchhuah siamin, Mizote buma India danpui kalha ei zawng ṭhin Mizote chu thil ṭha lo leh dik lo ti tura Guwahati leh a chhehvela kal lo turin an hriattir a; Guwahati leh a chhehvelah sumdawnna thianghlim lo - pawisa tak leh a lem inthleng tawn, ailáidum man to taka hralh, rangkachak lei leh hralh, damdawi supply leh thil dang tam tak a awm ṭhin tih an tarlang.

Tun hnaiah Mizo­ram pawn lam­ah Mizote a chhe zawngin kan chan­chin hriat tur a awm fo mai a, heng zinga a tam ber hi chu sum thianghlim lo duhna leh hausak thut châkna nena inkaihhnawih niin a lang. Thawhrim vanga hausakna ni lo, sumdawnna pangngai ni lo hmanga sum thianghlim lo siam leh vawi leh khata hlawk duhna hian Mizote min tihmingchhe hle a ni.

Mi dik lo leh fel lo, thil dik lo hmanga sumdawng duh hi hnam tinah an awm ngei a; amaherawhchu sum hmuhna dik leh fel tawk lo tih hre reng chunga Mizo hnam pum hmingchhiat hi thil hlauhawm tak a ni.

Kan hre ṭheuh a, khaw chhak aṭanga dan loa kuhva lakluh pawh 'smuggling' a ni tih hre reng chungin sum hmuhna a nih miau avangin kan sawi chhe phal lo; mi tam tak chuan smuggling hi a pawina an hriat loh thute hial an sawi zak lo.

Tuna Guwahati leh a chheh­vela Mizote sum siam tumna hrang hrang an rawn sawi chin ringawt pawh hi ngaihtuah chian chuan hausak thut duhna nen thil kal kawp tlat a ni a, insiam ṭhat kan mamawh takzet a ni.

Tun hma chuan Mizote hi hnam rinawm leh tlawm­ngai tak tiin min hre ṭhin. Tun hnaia state pawna kan chanchin than danah hian a duhawm lo lam a tam em em mai a, Mizoram pawna Mizote leh sumdawnga vak chhuak ṭhinte i fimkhur thar ang u.