Grape chingtute dinhmun

Horticulture department enkawltu Chief Minister chuan grape thar chhuahte kalpui dan tur an buaipui mek thu a sawi a, Mizoramah zu khap burna dan hman mek a nih si avangin grape tuia alcoholic content sang lutuk siam rem dan a awm leh awm loh an buaipui mek thu a sawi.

Deputy Chief Minister kaihhruai Mizoram Liquor Prohibition (MLP) Rules zirchiangtu committee chuan grape aṭanga wine siam leh zawrh chu khap ṭha an ti a, thutlukna siam turin Cabinet-a thlen an rel tawh. He committee hian zau zawka inrawn khawmna an buatsaih a, kohhran leh tlawmngai pawlte nen an inrawn hnuah wine khap hi an rel ta a ni.

Mizorama kan grape chin tam ber hi chu a eia ei tur chi lam ni loin a tui sawra wine-a siam tur chi a ni a, hei hi grape chingtute hlawkna hmuh ve theih dan ber a ni. Mizorama a hlawm liana grape chin bul ṭan hi mimal remhre deuhte hmalakna ni loin sorkar hmalakna hnuaia kum 20 vel liam taa Champhai district-a an kalpui ṭan kha a ni a, a kal zelna turah pawh sorkar hian buaipui zui thei se a ṭha hle.

Tuna Champhai district-a grape chingtute innghahna ber chu an grape tui sawra wine siam a, chumi hralhna aṭanga sum lakluh chu a ni a; nimahsela hei hi khapsak an ni dawn a ang hle.

Budget session-a Chief Minister chhanna hian grape chingtute beidawng lutuk tur pawh beiseina a siam thar lehin a rinawm a, wine hi tunah chuan India sorkar pawhin chaw chi khat (food item) anga a pawm tawh avangin zu anga ena a tui sawr khapsak ringawt hi chu thil fel ber a ni lo thei.

Kan sorkar hian zu a khap a nih pawhin grape chingtute hian an hnathawh rah an seng theihna tura remchanna siamsak hi an phu hle a ni.