Health care ngaihtuah a ngai

Assembly session-ah Health Minister chuan Mizoram State Health Care Scheme (MSHCS) hnuaiah bill tang cheng vaibelchhe 59.83 a awm thu a sawi a; Chief Minister chuan tlin leh tlin loin harsa tak chungin health care scheme kalpui a nih thu a sawi a, sum dinhmun a ziaawm deuh hunah ṭha zawka kalpui theih a inbeisei.

Mizoram State Health Care Scheme kalpui dan hi ngun zawka zir chian a ṭha hle mai a, tuna leiba awm zozai ngaihtuah hian heti lo deuha her rem pawh a ṭha zawk mai thei. Chief Minister sawi ang hian sorkar hian tlin leh tlin lo chungin a kalpui a, ṭha an tih em avangin an zawh loh tur thil an kalpui a ang a, heti zat pawisa ba hi rûl fel tur chuan hun a duh hle dawn tih chu thil chiang sa a ni.

A ruh langa sawi chuan sorkar hian damlo inenkawl­na bill peksak hi a ba vek bik lo a, pek hleihtheih loh tur thlenga peksak intiam ai chuan pek theih chin thliar hran a, felfai deuha kalpui pawh hi a a ṭha zawk mai thei a, ngaihtuah ngun ngai tak thil a ni. Tunah hi chuan damlote'n MSHCS-a bill leh beiseina nen an nghak a, sorkar sum pek chhuah theih loh tling khawm hi a tam zozai tawh lutuk a, Mizoram sorkar pawisa che vel nena thlir kawp phei chuan damlo hi awm belh tawh miah lo pawh ni se sorkar hian damlo bill a bat hi a tam lutuk tawh a, a rûl rei hle ang tih a rin theih.

Engpawhnnise mipui hma­ngaih vang te pawh a ni ang a, vote a ken tel vang pawh a ni thei e, health care lamah sorkar hi a thu-in a inphal viau mai. Mipuiin an pek ve tur zat an pek hnuah sorkar hian a takin pawisa a pe chhuak leh thei si lo a, sorkar tana phurrit lutuka kal reng mai hi a dik lo a, ngaihtuah nawn ngam a ṭha hle awm e.