Covid-19 No Tolerence Drive hnu lam

Mizoram sorkar chuan Covid-19 hri darh zel tur veng turin Mizoramah Covid-19 No Tolerence drive a kalpui mek a, November 30 thleng a awh ang. He mi chhung hian sorkar lamin theihtawp chhuahin hripui laka mipuite himna turin hma a la a ni.

He Covid-19 No Tolerence Drive hi ruahman lawk ang chuan November 30-ah a tawp dawn a, a tuk chu december a ni tawh dawn a, Mizo Kristiante thla nghahhlelh ber ang pawhin a sawi theih hial ang. Krismas thla a nih vang te, kum khat chhunga thla tawp ber a nih vang te, hunpui hmang tura kawng hrang hranga kan inbuatsaih thla a nih vangte leh chhan hrang hrang avangin December thla bik hi Mizote kan chet vel nasat thla a ni.

Kum dang ang chu ni se Krismas bazar avangin khawpui chu a tawt leh hle ang a, zan lamah ṭhalai puipun programe an buatsaih awl lo ang a, kohhran programme pangngai bakah kohhran ṭhalai lamin hla zir leh anmahni pual hun an hmang ang, zirlai chawlh hmangte âwl lai a lo ni bawk nen, kan zavai maia kan chhuah tam thla a ni deuh ber mai.

Kumin erawh a dan a dang dawn a, Covid-19 hripuiin min chen chilh miau avangin kan hun hman dant ur pawh sawi lawk theih a ni ta lo. Kohhran hrang hrangin Krismas leh Kumthar ruai ṭheh loh an rel tawh a, hei hian kan krismas boruak pawh nasa takin a tidanglam dawn tih a chiang tawh a, chuti chung chuan Krismas a nih miau avangin thawmhnaw thar leh thil thar lei lam chu mi tam takin an ṭhulh phah kher lo ang.

He hunpui lo thleng tur atan hian sorkar a inbuatsaih lawk a ngai a, ṭum danga chawpchilh taka ruahmanna a siam chuk chuk ang ni loin tun aṭangin December-a kan awm dan tur hi a theih chin chin ruahmanna lo siam lawk se, khawpui hri vei tamna leh hri awm lohna nia lang thingtlang awm dan turte thlengin ngaihtuah kim se; chawpchilh taka rel loin, tun aṭangin Covid-19 No Tolerence Drive hnu lam hun hi ngaihtuah lawk a hun e.