Economic molecule

Chief Minister chuan Assem­bly Budget Session-a zawhna ziaka chhangin, "Kan ram economic molecule pawi­mawh tak chu mau hi a ni," a ti a; economic molecule chu Mizoram economy tih­hma­sawnna tura thil ṭangkai leh mamawh, ramin a neih sate leh hmasawnna rohrel sawina a nih thu a sawi.

Economic mole­cule hi miin an hman zen zen loh ṭawngkam a ni a, kan Chief Minister-in a rawn sawi chhuah tirh pawh khan a lar hat reng a ni. Economic molecule tih hrim hrim hi thil thar a ni lo a, nimahsela tuna kan sawi dan leh hmun danga an hman dan hi chu a inang chiah lo deuh. Engpawhnise kan rama economic molecule chu mau a nih thu kan hre ta.

Chu economic molecule pawimawh tak chu eng angin nge kan ram hian kan hman ṭangkai dâwn tih hriat a chakawm tawh a, mau/ rua hmanga kan ram economy chawi san tumtu Chief Minister kan neih avang hian a la hlawhtling thei ang tih pawh ring ngam ila a ṭha awm e. Kan mau/ raw neih ang angte hman ṭangkaina lam aia a lakluh leh a chi kui ṭiah leh supply lam kan tuipui lutuk erawh hi chuan ngaih a tiṭha lo. Tuna kan kalpui dan en mai hi chuan kan mau/rua hi 'economic molecule' pawimawh tak a ni phak lo mai ang tih a hlauhawm rum rum a ni.

Mau hman ṭang­kaina lam sawi tur awm meuh si lo, mau chi supply thawm a ring viau mai leh bamboo link road project lam kan läwm viau dan en hi chuan man hmanna tak tak lam hi kan la hlat hmel hle mai a, mau aṭanga pawisa hai luh leh sawi chhuah piah lamah hian a taka mau hman ṭangkai a, kan Chief Minister sawi anga economic molecule pawimawha chantir hlan a nghahhlelhawm takzet tawh a ni.