Lengpui Airport chhehvel

Lengpui Airport chei ṭhat hna thawh mek chu tun hnai khan a chim a, hnam dang pahnih an hliam.

Assembly session neih zawh taka zawhna chhannaa a lan danin, Lengpui Airport chei ṭhat hna hi Zoramchhana, Electric Veng, Aizawl leh KR Constructions-in an thawk a, KR Constructions hi Kamrul Lashkar (Kamlova Chhangte) ta a ni.

Airport-a hna­thawh lai a chim ringawt mai hi a hrilhhaithlak a ni satliah lo a, a thinurthlak takzet a, sorkar tán tak pawh hian a thinurthlak zualin a rinawm. Lengpui Airport hi kan Chief Minister hian a vei em em a, Covid-19 hripui kan hlauh vanglai pawh khan a khat mawi tawkin airport chei ṭhat hna kal mek hi a tlawh fo ṭhin. Tuna contractor zinga pakhat zawk hi Chief Minister laina hnai tak a ni a, pakhat zawk hi contractor lar leh hna hmù thei tak, hnam dang ni chunga Scheduled Tribe certificate nei thei, sawiselna avanga tun hnaia Scheduled Tribe certificate pek kir tum mêk a ni.

Chief Minister hmelhriat hnai tak pahnih hnathawh lai kher a han chim hi a pawi a, Mizoram mipui tana hmun pawimawh em em maia hna pawh hetianga a chim a nih chuan, hmuh phak loh hmun kilkhawra an hna te pawh a rinhlelhawm zo vek palh ang tih a hlauhawm ta hle. Tuna chim ta hi tu hnathawh lai nge hriat ni lo mah se, anni pahnih hi MNF kaihhruai hnuaia hna lian tham thawk nasa an ni a, hetianga kan ram rohlu tur zinga mi, hripui len laia sum awm lo an ti chung pawha sum tam tak senna a chim mai hi a pawi takzet a ni.

Vanduai vanga thil thleng a awm thei a, tuna airport cheina chim dan en hian a bante thlenga a tlu sawp mai hi a sak a ṭha tawk lo hrim hrim a ang hle.

He thil thlenga mawhphurtu contractor te hi sorkarin a hrem dâwn nge, engtin nge a tih zui dâwn mipuiin an thlir reng dâwn a ni.