A chim chhan chhui a ṭul lo em ni?

Lengpui Airport sak ṭhat mek chim chu Chief Minister-in a tlawh nghal a, "Rang taka siam ṭhat leh nghal vek a ni ang," a ti. PWD lam pawhin thuchhuah nei nghalin pawi an tih thu an sawi rualin contractor leh enginner-te'n an en nghal thu leh, sum sen belh awm loa siam ṭha leh nghal tura contractor an hriattir thu an chhuah.

Lengpui Airport siam ṭhat chung chang hi a tir aṭang tawhin sawi a hlawh a, a siamtu tur con­tractor thlan fel hmain hna bul an ṭan tawh niin an sawi. He airport siam ṭhat mek hi hna dang zawng aiin kan Chief Minister hian a ngai pawimawh a, vawi tam tak a tlawh. Political party lam thuchhuahin an tarlan dan chuan hripui len vanglaia ZMC a tlawh miah lohlai pawhin airport chei ṭhat hi chu a tlawh ngun hle a ni.

Chief Minister-in a hmunah a tlawh nghal a, siam ṭhat a nih tur thu a sawi hi thil lawmawm tak a nih rualin hetiang taka hna chhia hi a thawktu hrem emaw, a chim chhan chhui emaw lam a sawi lang miah lo. PWD lamin thuchhuah an siamah hian contractor tih an tarlan laiin contractor hming hi an ziak lang miah lo bawk a; Mizoram sorkarin sum a indaih loh vanglai tak, a hnathawkte hlawh pawh a pek kim hleih­theih loh laia state sum tam tak senga hnathawh ni si, hna chhiat avanga chim hial ni bawk sia contractor hming sorkarin a puangzar lo hi a mak hle.

He hna hi hmun danga hna thawh chhe takte nen a inang thei lo a, kan Chief Minister-in a ngaih pawimawh ber zinga mi leh a tlawh zin em em ni chunga an hna a chhe tlat maite hi hriatthiam a har a, media leh social; media hrang hranga kan hmuh a sakna hmanrua leh an sak dante thlenga duhthu a sam lo em em mai leh mualpho taka a chim ta hial chunga 'hremna' leh 'chhui chianna' lam sawi ri loa siam ṭhat leh thu sawi ringawt hi a mak hle a ni.

Kan sorkar hian Lengpui Airport chei ṭhat mek, an hnathawh chhiat avanga a hun loa chim leh a hmanraw hman duhthusam lo tak takte hi chhui chian ṭul a ti lo em ni?