Abub Majumdar leh Mizoram sorkar inkar hi Mizo mipui hnenah puan a ngai

Kuhva tawlh ruknaa in­hnamhnawih avanga Assam police-in an man tak, Abub Mazumdar Ahmed chu December 15, 2018-a MNF kaihhruai sorkar lakluhna inkhawmah a tel tiin Congress party chuan tun hnai khan an sawi a, Assembly House-ah pawh he thu tho hi sawi chhuah a ni tawh.

Abub Mazumdar Ahmed hi a hlawm liana Mizoram sorkara buhfai supply-tu tlem te zingah a tel a, chu mai ni loin ramri buai chungchanga Mizoram leh Assam Chief Minister-te mi pawimawh tlem te nen an inkawmnaah pawh a tel ve nghe nghe a ni.

Chief Minister pahnih inkawm­naa Abub Mazumdar-a tel ve chungchang hi Chief Minister's Office meuhin thu­chhuah siamin Mizoram lam sawm a nih loh thu an sawi a, MNF-in thuchhuah siamin Mizoram lam sawm a nih loh thu an sawi rualin an inkawm hma hian Mizoram House-ah Mizoram Chief Minister nen an inkawm thu an sawi lawi si a ni.

Engpawnnise he pa, Myan­mar aṭanga kuhva rah tawlh­rukna lian taka inhnamhnawih nia Assam media-te'n an puh hi Mizoram sorkarah hian thil a tithei thawkhat hle tih chu thil chiang a ni. MNF sorkar a ding chiah a, mi pawimawh sawm bik tle te zingah telin sorkar lakluhnaah a tel a, buhfai supply-tu pawh a ni phak.

Chief Minister pahnih inbiaknaa a hmel lo lang ve hi a mak a, Assam media lamin Mizoram lam sawm nia an sawi chu Chief Minis­ter office leh MNF party-in a nih loh­zia rang takin an sawifiah nghal vat a; nimahsela BJP, Mizoram chuan Assam CM Office lam an biak pawhnaah chuan Abub Majumdar hi Mizoram lam sawm niin an sawi ve thung.

Engpawhnise Mizoramin kuhva tawlh ruk kan buaipui vanglai taka chu thila in hnam­hnawih ngei nia hriat vanga a chenna state-in an man hi Mizoram sorkarah a mikhual lo hle tih a chiang. Mizoram sorkar hian Abub Majumdar nena an inkar hi mipui hriatah sawifiah rawh se.