Airport chim sak ṭhat hmain chhui chian a ṭul lo maw?

All Mizoram Cement and Iron Rod Dealer's Association chuan tun hnaia Lengpui Airport chei ṭhat mek chim ta chu hmanraw ṭha tawk lo hman vanga chimah an ngai a, a hmuna an tlawhnaah Quality Control of Cement and Iron Rod Committee-in lakluh an phal loh iron rod ṭha lo an hmang tih an hmu chhuak.

Mizoram Mistiri Association pawhin airport sak­naah hian rod zawm dan leh cement proportion a ṭha tawk loah ngaiin tui mamawh tawk an pe loah an ngai bawk a, a sak a ṭha lo hle niin an sawi.

Mipui suma sak kan airport neih chhunah hian Mizo­ram sorkar chuan sum a ren loin a neih chhun ang ang pawh a seng hreh lo tih a lang reng a, sorkar hnathawk hlawh a pek hleihtheih loh laiin sum tam tak a pe chhuak thei. Nimahsela chu sum an hman dan leh tuna kan thil hmuh aṭang hian airport satute hian an sa ṭha lo hle tih a lo lang.

Tun hnaia airport sak chim ta hi mipuiin an vei hle tih hi kan sorkar hian hria se, hmanraw dik lo an hmang tih hmu chhuaktute pawh hian ṭhahnemngaihna thilah a hmunah ngei tlawhin an enfiah a, iron rod ṭha lo leh size tling lo an hmang tih an hmu.

Heti chung hian kan sorkar hian contractor hi a hrem lo emaw, a endiktu leh viltu engi­neer-te a khak lo emaw a nih chuan airport saknaah hian tu emaw thuk takin a inrawlh niin mipuiin an puh palh ang tih a hlauhawm hle.

Kan CM ngei hian press mite hmaah Kamrul-a an duhsak bik loh thu leh duhsak loh bik loh thute a sawi rualin contractor hminga hnathawh a awm chu a zêp lo tih a sawi zauh tawh a, heng te hian ngaih a tiṭha lo thar zual a ni.

Airport chei ṭhat mek a chim a, hmanraw tling lo leh dik lo an hmang tih a zuartu pawl lamin an finfiah tawh bawk. Chuti chung chuan an siam ṭha leh ringawt dawn nge, contractor hi an hremin contract hna thawk chhunzawm thei loin an siam dawn?