Sikul hawn leh tur thu

School Education Minister chuan April 5, 2022 aṭangin Mizorama sikulte hawn ṭan a nih leh tur thu a sawi a, zirna in zawng zawng hawn tura ruahman a ni.

Zirna in khar a nih chhungin sikul ṭhenkhatin online class an kalpui thei a, chutihlaiin thingtlangah leh hmun ṭhenkhatah online class kalpui ve thei lo an awm. Thuneitu lamin online exam-te buatsaihin zirlaiin an pawl sawn ve zel mah se, a taka an zir loh avangin thiamna an neih tur ang an nei tawk lo niin a lang a, a pawi hle a ni.

Hripuiin ziaawm lam a pan hret hret zel a, state dangte pawhin zirna in an hawng leh ṭan tawh a, Mizoram pawhin zirna pangngaiin kalpui a tum ve ta a, a lawmawm hle a ni. Thil dangah nunphung pangngaiah kan kir leh mek tawh a, nu leh pate eizawnga an chhuah a ṭul a, enkawltu nei mumal loa naupangte ina hnutchhiah tawk an awm lo thei lo a, hengte pawh hi a him lo hle a ni.

Tunah chuan hripuiin ziaawm lam a pan chho zel a, sorkar lam pawhin kan zavaia tana ṭha turah ngaiin zirna in hawn a tum ta a, a lawmawm hle a ni. Zirtirtute pawh zirlaite ṭha taka lo dawngsawng turin uluk takin inbuatsaih thei se, hripui avanga khung hran tawk leh hripuiin a man zirlaite rilru lam thlenga a nghawng tawh avangin zirna piah lamah boruak ṭha tak hnuaia zirlaite dawnsawn dan thiam a pawimawh hle ang.