Bawlhlawh paih man tihpun tur hi Aizawl mipuiin an hrethiam ang em?

Aizawl Municipal Corporation Board of Councillors ṭhukhawm chuan bawlhhlawh paihna senso mipuiin an chawi ṭhin chu tihpun an rel a, bawlhhlawh paihna senso AMC-in 80% an tum ṭhin chu 60% chiah an tum tawh dawn a, mipuiin (Local Council-in) 40% an tum a ṭul tawh dawn a ni.

AMC hian bawlh­hlawh paih man sang zawk mipui aṭanga khawn hi an hreh ve hle ang tih chu a rinawm; nimahsela AMC-in tun hmaa dawn ṭhin sum a dawn kim loh avang te, bawlhhlawh sawngbawlna an enkawl dawn tak avangte leh chhan hrang hrang avangin mipuia pawisa khawn hi tipung lo thei lo dinhmunah an ding ni ngeiin a rinawm.

Bawlhhlawh paih man sang zawk chawi hi mipuiah hrethiam tawk lo an awm ang a, chutih rualin a hun ve tawh tia hrethiam tak pawh an awm ngei ang. Hetihlai hian bawlhlawh paih man sang zawk chawi tur mipuite hian AMC sum hmanna dang hi ngun zawkin an chhui ngeiin a rinawm a, term hmasa anga thil ṭul ber ni loa Councillor-te zin chhuak nasa lutuk te leh sum hmanna sawi fiah hleihtheih loha 'miscellaneous' tiha tam tak dah ang te kha an hrethiam lo thar hle ang tih a rin theih.

AMC hnuaiah hna ṭha leh ṭangkai tak tak ṭha­hnem tak a awm rualin hna ṭha lo leh sum hmanna holam tak tak anga ngaih theih a awm nual tawh a, chumi piah lamah sum hman dan dik lo tia rinhlelh tur project lian tham te pawh a lo awm tawh ṭhin a ni.

Chutiang taka pawisa lo hmang tawh ṭhin AMC hian pawisa neih loh chhuan­lama hmanga mipuia bawlh­hlawh paih man sang zawk a khawn rual hian an lakah mipui thikthu a chhe sawt dawn tih hre tel se; bawlhhlawh paih man tihsan a nih rual hian AMC laka mipui beisei a sang tel dawn tih hre reng chungin hnathawk zui se a ṭha hle awm e.