Sikul naupangte dinhmun

School Education minister chuan, pawl 10 leh 12 zirlaite tana MBSE-in exam a buatsaih ṭhin chu kalpui ngei tum a nih thu a sawi a, "Class dangte pawh exam buatsaih a nih loh pawhin, a páwnga taka promote ngawt tum a ni lo," a ti a; pawl dangte kal dan tur hi ngaihtuah tur a nih thu a sawi. 

Covid-19 avangin khawvel a buai a, a nghawng nat zing­ah zirlaite an tel. Khawvel hmun dangte ang bawkin Mizoramah pawh zirna inte hun rei tak chhung khar a ni a, hetih chhung hian online class-te buatsaih ṭhin a ni. Online class hi sikul ṭhenkhatin harsatna nei loin kalpui thei mah se, thingtlang khaw tam takah kalpui theih a ni lo a, khawpuiah pawh chhungkaw ṭhenkhat tana phurrit thlentu a ni. 

Hetihlai hian zirlaite'n an zirna hun kum khat tawp mai an paih hi nu leh pa tan leh a zirlaite tan pawh a uiawm a, exam pawimawhte kalpui hram dan ngaihtuah a ni hi thil lawmawm tak a ni. Chutih rualin fimkhur theihtawpa kalpui a ṭul tih chu kan thil tawn aṭangin a lang chiang reng tawh a, zirna in hawn leilawk hun chhung rei lo teah hripui hi a darh nasain zirlaite an inkai chhawng nasa hle tih kan hmu.

Exam buatsaih tur hi a rang lamin thuneitute hian tichiang se, an exam hun tur leh an zirlai tur chin te, a kalphung tur kimchang te pawh zirlaiten hre hma thei se a ṭha hle. Mahni sikul awmna exam centre-a exam kher tur a nih chuan thingtlang zirlai tam tak chu khawpuiah exam tura an kal a ngai dawn a, Covid-19 avangin hostel tam tak khar a ni a, thlen in tur thlenga a harsat avangin sorkar hian a hawi lam a tihchian hma a ṭha ang. 

Hei bakah hian board exam hmachhawn ve tur ni lo zirlai dangte pawh pawl an sawn theih dan tur te rel fel hma ni se, Covid-19 avanga nasa taka buaina tawk tawh zirlaite hi an zirna kalphung rel fel har vangin buaina tawk nawn lo se a duhawm hle a ni.