Buh leh thlai hlawk zawka thar

Agriculture minister chuan buh leh thlaite hlâwk zawk leh tam zawk thar a nih theih nan ruahmanna kalpui tum a nih thu a sawi; dan mumal tak hnuaiah a huhoin loneitu intél khawm (farmer's producer organisation) kaltlangin hlâwk zawk leh tam zawka buh leh thlai thar lam kalpui tum a nih thu sawiin, "Tunlai thiamna hman ṭangkai zel tum a ni. Buh chi ṭha RCM-10 pawh hlawhtling taka enchhin a ni tawh," a ti.

Sorkarin buh leh thlai hlawk zawka thar thei tura rua­hmanna a siam hi thil lawmawm tak a ni a, a hlawhtlin hlan a nghahhlelhawm tawh hle a ni.

Tuna kan kalpui dan tlâng ram lo neih pangngai hi chu sum leh pai nei sâ lo tan chuan hlawk chu sawi loh ei khawp bâk thar a harsa a, a sum zawnga chhût phei chuan hlawkna a awm mang lo anga sawi theih hial a ni awm e.

Hetihlai hian khawvel hmun dangah tlâng ramah miin kuthnathawh hi an hlawhtlinpui thei a, hlawk taka kalpui thei pawh an awm. Mizoram sorkar hian hun rei tak ata tawh kha kuthnathawktute dawm kanna turin project hrang hrang a kalpui tawh ṭhin a, nimahsela vanduaithlak takin a nawlpuiin an hlawkpui theih project hi an la hmu fuh lo a nih hmel.

Tunah kan sor­karin buh leh thlai hlawk zawka kalpui dan an hre thar leh ta a nih hmel a, an sorkar term hman mêk aṭanga chhut erawh chuan an ngaihtuah chhuak tlai mah mah niin a lang. Term tir lamah te khan lo hre tawh se tunah hian kuthnathawktute pawhin a hlawkna an tel thei tawh tur a nia!