Dan loa thil lakluh leh Mizoram

Mizoram Pig Farmers' Association (MIPFA) chuan dan dik loa dan hrula vawk laluttute police-in an man thei lo chu mak an tih thu an puang a, "Dan loa vawk lak luh hrim hrim police-in an man thei lo hi a khawi lai ber hi nge dik lo tih sorkar kan zawt nghal a ni," tiin thuchhuah an siam.

Ram pawn aṭanga dan loa vawk lakluh chungchang hi sawi neuh neuh a tam hle mai a, tun hma deuh aṭang tawh khan vawk lakluh kawnga man hleihtheih loha thiltithei bik an awm ṭhin, tih thuthang a awm. Tun hnaiah pawh dan loa vawk lakluh hi an la kalpui reng a, police lamin an la man hleithei lo zel a nih chuan thil chhui chian ngai tak a awm a ni ngei ang.

Tun hnaiah kuhva chung chang a rawn ri hluai a, hei hi dan loin hun rei tak an lo tawlh tawh a, a tawlhrutute hi man mang lohin an chhuak fo ṭhin. Myanmar aṭangin dan loin a lo lut a, kan ram kawngpui lûn tak zawhin Vairengte checkgate paltlangin an phur chhuak reng a, khaw enlaia smuggling kalpui pawh man fuh hleithei lo sorkar kan nei a ni.

Mizoramah hian dan loa thil lakluh a tam hle tih hai rual a ni lo a, a bikin khaw chhak lam aṭanga lo lutte hi dan ang thlapa lakluh a ni lo deuh vek ang. Heng thil lo lut zingah hian kan rama mite'n an tawrh theih thil a awm a, chumi zingah chuan dan loa vawk lakluh hi Mizorama vawk vulhtute'n an tuar mek tih a lang.

Hei vang tak hian sorkar pawhin Mizoram chhunga vawk vulhtute hma ngaiin dan loa vawk lakluh hi titawp thei se a ṭha hle mai.