Ruihhlo leh Mizoram

Tunlai hian Mizoramah ruihhlo chi hrang hrang a hluar hle a, Excise & Narco­tics Department (END) lamin Mizoram hmun hrang hrangah ruihhlo man tur an nei deuh reng a, a bikin heroin a hluar hle a ni.

Mizoram hi ruih­hlo tawlhna kalkawng berah a awm niin an sawi ṭhin a, tunah hian khaw chhak aṭangin ruihhlo hlauhawm tak tak a lo lut fo a, chumi piah lamah state ṭhenawm aṭanga damdawi ruih theih chi hrang hrang a lo lut reng bawk.

Tun hnaiah hian ruihhlo chi hrang hrang a hluar niin an sawi a, ruihhlo ti thar an tam bakah ruihhlo lei mai tur pawh a tam lai leh a man pawh a hniam lai niin an la sawi cheu bawk.

Kan ram dinhmun en hian ruihhlo dona kawngah hian theihtawp kan chhuah tlan leh a ngai viau mai a, sorkar leh tlawmngai pawl kuta dah ngawt a tawk lo. Kohhran leh mimal tin pawh kan ṭan tlan a ngai tih kan dinhmun thlir hian a chiang hle a ni.

Ruihhlo nghawng hlauh­awmzia leh taksa leh mihring nun tana a pawizia kan hre chiang tawh a, chhungkaw tam tak an rûm mek a ni. Mahni zawn ṭheuhah ṭan kan lak thar a ngai a, END leh police lam pawhin ngaiah nei mai loin ṭan la thar thei se. Tlawmngai pawlte pawhin kan dinhmun zir chiangin ṭan lak thar tum se, ruihhlo do turin i ṭang thar leh ang u.