Maktadûai chuang lei theihna rua sum lakluhnaa hman a hun tawh

Mizoram Chief Minister chuan, raw hmun ṭín 5-7 vela zau neih chuan kum tin cheng maktaduai khat lei chhuah theih a nih tur thu a sawi a, "Ram ṭín 5-7 hmun hi raw hmùnah nei ula, ruain khat vek se, a puma hralh ringawt pawhin kum tin cheng maktaduai khat a lei chhuah theih. A process-in a lêtin a la tam thei," a ti.

MNF kaihhruai sorkar hian an flagship programme-ah mau/rua an hman thu Chief Minister hian a sawi tawh a, he mau/rua hmang hian sum tam tak lakluh theih a nih thu pawh vawi duai lo a lo sawi tawh ṭhin. Kan state hotupa ber hian mau/rua hi hausakpui tham a nih thu leh, kan state economy chawikânna tura an hman tur thu pawh a lo sawi tawh ṭhin a, kan ram hi mau/rua ṭhat duhna a nih vangin a beisei sáng hle a ni.

Chief Minister berin heti taka a buaipui leh a atchilh a nih vang hian a hlawhtlin theih hlauh chuan kan state hian a din chhuahpui thei dâwn a ni mah thei a, chutih rualin a hlawhtlin loh palh erawh chuan state tán a pawi hle thei bawk awm e. Ka State hotupa berin vawi tam tak uar taka a sawi tawh hi a thawhpui Minister dangte hian Vantlâng hriatah hian an sawi chhuak tlem hle mai a, an tuipui ve lo nge, an pu sawi hi an ring tih hriat a harsa a, kan state flagship programme chungchang la sawi ve lo Minister hi kan nei thluah awm e.

Engpawhnise, state khat sorkarin a hlawhtlinpui tum ber leh sum lakluhna hnar atana a hual ber mau/rua hi Mizoram hian tun thlenga sum lakluhna atana a la hmang lo hi chu thil mak tak a ni a, a hlawk turzia leh state economy chawikangtu tur ber ni si; tun thleng chuan sum lakluhna hnar ni loin a chi man leh thil dangah pawisa kan la seng zawk zel a, sum lakluhna aiin sum chhuahna lam a la ni.

Nakin maia kan hlawkpui tur leh kan hausakpui tur ni si tun sorkar kum linaah pawh a hlawkna tel tur a la awm lo erawh hriatthiam a harsa a, ṭin 5-7 hmuna cheng maktadûai lakluh theihna dang a vàn tehlul nen, sorkar term tawp lama kan hotupain a sawi chhuak chauh mai hi chu a thup rei lua deuh bawk a ni.

Kan Chief Minister hian mau/rua aṭangin sum a lakluh theih thu hi a sawi tam ta a, a thusawi hi a taka chantira thil theih a nih tak tak chuan a taka tihhlawhtlin a hun tawh takzet a ni.