Ruling party leh sorkar

Mizo Students’ Union (MSU) General Headquarters chuan thuchhuah siamin, SEDP hnuaia zirtirtu lâk kal mekah East Lungdar Primary School-a zirtirtu tur pahnih leh East Lungdar High School atana LDC pakhat lak turah East Lungdar MNF Group-in advertisement an chhuah chu pawi an tih tak zet thu an tarlang a; MNF-in advertisement an chhuah hmanga thawktu lak chu sût an phût a, School Education Minister hnenah an thlen.

Mizorama kan political party kal­phung han thlir hian, ruling party mi leh sâ ṭhenkhat hi chuan sorkar kaihruaitu an nih inhre loin anmahni hi 'sorkar' emaw an inti ta hi a ang ṭhin a, sokar kaihruai tura thlan tlin mai an nih hi an hriat fuh a pawimawh hle.

Sorkarna vawnfung chelhtu nih hian a party-a hi sorkar an ni lo a, sorkar enkawltu chauh an ni tih hi hriat fuh a ngai hle a ni.

Tun hnaia thil thleng pawh hi ruling party lam an ṭang ulh niin a lang a, Mizoram sorkar kalpui dan kalphungah ruling party mi leh sa duhsak an ni ṭhin tih hai rual ni lo mah se, ruling party em emin advertisement an chhuah hi chu a awm ngai kher lo ang.

SEDP sum hmanga zirtirtu rawih belh hi a sum neitu chu 'mipui' an ni a, ruling party sum pawh a ni lo a, chuvangin political party bikin advertise­ment an lo chhuah mai hi chu kalphung an hriat fuh tawk loh vang a ni ngei ang.

Sorkar leh ruling party hi thil thuhmun a ni lo a, tun hnuah chuan sorkar sum hmanna tur chi-ah reng reng ruling party hming lang tawh lo se, nakin zelah party tán pawh a ṭha zawk ngei ang.