Hri lakah mimal kan fimkhur a ngai

Union Home Ministry chuan kumin March 31-ah Covid-19 khuahkhirna siamte chu tihtawp vek a nih tur thu an puang a, hetihlai hian face mask leh social distancing erawh ngaih pawimawh chhunzawm zel a nih tur thu an sawi.

Kum hnih zet chu khawvelah hripui a leng ta a, India ram hi a tuar na ber zinga mi kan ni a, India-ah pawh Mizoram hi hripui avanga buai rei ber pawl kan ni bawk. Tunah erawh chuan India ram hmun dangte ang em chuan hripui dinhmun la ziaawm chiah lo mah se Mizoramah pawh hripui vei an tlahniam zel a, a vei thar pawh an tlem ta hle a ni.

Tunah chuan sorkar laipuiin hmalam enin nunphung pangngaia kir leh turin ruahmanna a siam ta a, hei hi Mizoramah pawh kan mamawh tawh viau a ni.

Mizoramah hripui din­hmun hmun dang angin tlahniam chak ve lo mah se, hripui avanga in­khuahkhirh reng hi kan tlin tawh lo a, state dangte angin kan inthlahdul ve hret hret a hun ta.

Hetihlai hian hripui hi a bo ta a ni lo a, kan ramah ngei pawh kan la thihpui reng a, a kai thar pawh kan la awm zel tho avangin kan fimkhur zui zel a ṭul.

Sorkarin inkhuahkhirhna a kalpui tawh lo a nih pawhin mimal tin kan fimkhur a ṭul chhunzawm zel dawn a ni.