Dan siamtuin kengkawh ngam se

Champhai DC chuan tun hnaia Champhai Bethel Assem­bly of God biak ina inneih­naah sorkar dan bawhchhiain punkhawm phal zat aia tam an pungkhawm tiin Rs 1,000 chawi turin thu a chhuah a, November 23 hmain DC Office-ah pawisa hi pe turin a hriattir. 

Mizoramah hian mipuite enkawlna leh thununna tura dan siam hi a tam hle a, hengte hi ken kawh ṭhat tawk loh a awm ṭhin. Tun hnaiah Covid-19 hri leng avangin mipui him zawkna tur dan siam thar a tam hle a, heng dan siamte hi Local Level Task Force lam an khauh vak lohna hmunahte chuan kenkawh ṭhat lohna a tam hle. 

Covid-19 hri a darh zel lohna tura mipuite enkawlna dan siam zingah mitthi vuina leh inneih inkhawma mi 35 bak punkhawm phal loh tih hi hmun tam takah an zawm ṭha tawk lo. Task Force an khauha an ṭhatna hmunahte chuan felfai takin hengte hi kalpui a ni. Chutihlaiin veng leh khaw ṭhenkhatah chuan 'inhriatthiamna' tiin a vuina hmun leh inneih inkhawmna biak in chhungah bik mi an tel tlem a, a chhehvelah mi tam tham tak an pungkhawm tho. 

Sorkarin dan a siam chhan hi inneih inkhawm leh mitthi vui dana thuneih a tumna lam a ni lo a, hri a darh zel lohna turin mipui pungkhawm tam lo se a duh vang zawk a ni. Chutihlaiin a mipui lamah hall/biak in chhunga luh kher loh chuan duh duh zat punkhawm theih emaw ti an la awm tlat hi a pawi a, sorkar lam lahin dan bawhchhiate chungah dan angin hremna a kalpui bawk ṭhin lo. 

Dan a awm tawh chuan 'inhriatthiam­na' tih hi hman a thiang tawh lo. He dan siam a nih chhan hi Cocid-19 hri len vang a ni tih hria­in, hri lengin min hriatthiam ve si loh avangin dan ang taka thil kalpui mai hi a ṭha ber. Champhai DC-in khauh taka dan a lekkawh ngam hi a fakawm a, district dang thuneitute pawhin mahni huam chhungah ṭheuh Covid-19 kaihhnawih dante hi tun aia khauh zawkin kalpui thei se a ṭha ngawt mai.