Myanmar buaina leh Mizoram

Myanmar tualchhung buaina kal zelah tun hnai khan Zokhawthar piah lawka awm Khawmawiah Myanmar sipaite leh Chin National Democratic Force (CNDF) an inkap a, he thilthleng avang hian Khawmawia cheng mipui tam zawk chu Zokhawtharah an tlan lut.

Tunah hian Mizo­rama district hrang hrangah Myanmar tualchhung politics avanga buaina kal zelah raltlan mi tam tham tak an awm tawh a, a zat hi sawi chian theih ni lo mah se a buaipuitute tana buaithlak khawpa tam an awm mek a ni.

India sorkar hian Myanmar ram buai vanga sahimna zawnga Mizorama rawn tlan kan unaute hi raltlan (refu­gee) angin a pawm duh si lo a, kan state hotute'n a enkawlna tur sum an dil pawh an pe ṭha duh lo. Tunah hian mi tlawmngaite thawh khawm leh sorkar aṭanga ṭanpuina awm thei ang angte nen enkawl mek an ni.

Myanmar tualchhung buaina hi a tawp mai dawnin a lang lo a, hun rei tak chhung chu inkahna leh buaina hi a la awm chho dawn a ang hle. Hei vang hian sahimna zawnga Mizoram chhunga lo lut hi an la pung zel dawn niin a lang a, heng raltlan tam zawkte hi kan unaute ngei an ni nghe nghe a, ṭha taka lo dawnsawn hi kan bat a ni.

Hetih rual hian a dawnsawn dan tur leh enkawl zui dan tur hi felfai tak leh huaisen taka duan ngam a ṭha hle mai a, tuna kan inenkawl dan ringawt hi chu state sorkarin a tlin loh chin a awm thei a, a him lo thei bawk.

Hei vang hian ruahmanna fel zawk nen raltlante hi lo dawnsawn tum ila, tumah hnar si loin kalphung fel fai tak duan hi a finthlak hle ang.