Sorkar sikulah admit sen loh?

School Education Minister chuan MNF sorkar hnuaiah zirlaite'n sorkar sikul an bawh nasa a, sikul an tihpun belh zel bakah sorkar sikulah zirlai admit sen loh an awm thu a sawi a; Congress sorkar hun­laiin sorkar sikul an tlahniam a, mipuiin private sikul an bawh nasat thu a sawi.

School Education depart­ment enkawltu berin zirlaite'n sorkar sikul an bawh nasat thu a sawi a, chu mai ni loa admit sen loh an neih thu a sawi tel bawk a, a department hnuaia mi a nih avangin a hre chiang turah ngai ila, hnial ngawt chi a ni kher lo ang. A thusawi nem­nghehna document pawh a nei ngei turah ngai ila, mipui vantlangin sorkar sikul dinhmun kan hriat ṭhin nen chuan a inang ta lo hle a ni.

MNF sorkar hnuah sorkar sikul a ṭha ta thut a ti hi a ṭhat tak thut leh thut loh hriat ni lem lo mah se, kum 2018 kum tawpah an sorkar ṭan a. Kum 2020-ah hripui a leng a, kum hnih zet chu sikul hawn theih a ni tawh lo.

Kum thum vel sorkarna vawnfung an chelh chhungin kum hnih vel sikul khar a ni a, chuti chunga sorkar sikul an ṭhang hman hle nia Minister-in a sawi hi a tak ni turah ngai ila, a department chan hnuaiah hmasawnna a kal chak hle tihna a ni a, a lawmawm khawp mai.

Hetihlai hian sorkar sikulin zirlai admit sen loh an nei ta, tia a sawi hi sawifiah phawt loh chuan pawm a harsa deuh mai thei.

Kum 2018-a MNF an sorkar hnuah academic session pangngai taka kalpui hi vawi khat emaw bak a awm lo a, sorkar sikula zirlai admit sen loh an neihna sikulte hi engzat chiah nge an nih hriat chian a chakawm khawp mai.