Kawlphetha hman man pung hi

Kumin April aṭanga hman ṭan turin Joint Electricity Regulatory Commission (JERC) for Manipur & Mizoram chuan kawlphetha hman man (power tariff) chu 6.78% in a tipung a, kawlphetha hi unit khan Rs 7.79 a ni tawh ang.

Kawlphetha hman man hi tun hnaiah a pung chak hle a, kum 2019 hnua a punna ringawt hi 50% bawr vel a ni tawh. Kawlphetha man hi tihpun a nih loh chuan sorkar phur a rit lutuk dawn niin mithiamte'n an sawi a, mipui tana phurrit lutuk ni si lo, sorkar tana kalpui theih tawk tur velin an chhût ṭhin niin an sawi.

Tunah hi chuan kawl­phetha hman man hi a pung chak lulai ta deuh a, zawi zawia a pung pawh mi tam tak tana harsatna thlentu a tlin laiin tun hnaia a punna zat hi a sang chak takzet a ni. Tun hnai kum thum chhunga a pun dan en hi chuan sorkarin sum a neih loh avangin kawlphetha hman man hi tipung lo thei lo dinhmunah a ding ta a ang hle.

Kan sorkar hian mipui phurrit tur hi dawn se, thil dang­ah insumin kawlphetha hman man hi heti em ema sang chak lo tur hian ruahmanna a siam theiin a rinawm.

Kawlphetha hman mana mipui chhâwk thei turin sorkar hi a pawisa hmanna ṭhenkhatah insum se, tunah hi chuan mipui tana harsatna thlen khawpin kawlphetha hman man hi a sang ta tih hai rual a ni lo.