Sakawrhmuituai project leh dikna

Sakawrhmuituai tlanga skywalk project leh Chaltlang leh Durtlang inkara ropeway siamna tura Swadesh Darchan Scheme II hnuaia sum lo kal chu tihchingpen nia ngaiin MNF Legal Board chuan Lok Ayukta-ah thubuai an thehlut a, hei hi Anti Corruption Bureau-in an chhui mek a ni.

Kum 2018 khan hetihlaia Tourism Minister chuan Asia khawmualpuia ropeway thui (sei) ber siam an tum thu a sawi a, hei bakah hian Sakawrhmuituai tlanga skywalk chu siam zawh a nih hunah Mizoram khualzin hotu a nih a beisei thu a lo sawi tawh. Vanduaithlak takin heng project pahnihte hi a puitling lo mai ni loin bul an ṭan fel deuh chiah tihin a hlamzuih a ni ta ber a, sum tam tak khawhral niin a lang thung.

He thil hi MNF lamin Lok Ayukta-ah thubuai an thehlut a, hetihlai hian Congress thupuangtu chuan CBI koh luha chhuitir ngei an inhuam thu a sawi a; MNF sorkar hnuah he hna hi chhunzawm niin MNF sorkara Tourism Minister pawhin kum 2019-a a tlawh thu leh kum 2020-a a tihchhuah Tourism Deptt E-Book ah pawh sorkar hmalakna kal mek anga tarlan a la ni zel tih an sawi a, hna an chawlh chhan hre chiang bertu chu Tourism Minister a ni tiin an inpuh tawn a ni.

Sakawrhmuituai tlanga sum tam tak luang ral nia lang hi a hre chiangtute an ngawih vang vang hnuah Tuirial bial bye-election campaign laiin Lungdaiah sawi chhuah a ni leh chauh a, hemi hnu hian a thu hi a kal chho ta zel a, tunah an chhui ta a ni. He thil hi chiang taka chhui chhuaha thil awm dang kimchang mipui hnena puanzar a, tisualtu an awm a nih chuan hrem a, tan ina khung hial ni se a ṭha ang. Chuti loa cheng nuai 1,000 chuang senna thil a zuzi ral leh mai mai a nih chuan Mizoramah dikna a lal lo hle tihna a ni ngei ang.