Sak chhiat vanga tlu Lengpui Airport Chhui loh leh hremna tawk awm lo hi
March 10, 2022 khan Lengpui Airport chei ṭhat meka baggage make-up area chim chu a chim chhan chhui a nih dawn loh chu PWD hotute chuan an sawi. He thil thlengah hian nunna chân awm loin hliam tenau tuar an awm a, thubuai ziah luh a awm lo; hremna tawk an awm lo bawk a ni.
Mizoramin hripui avanga harsatna a tawh vanglai tak, sorkarin sum lama harsatna namen lo a tawha sorkar hnathawkte hlawh hial pawh pûka hripui a do laiin Lengpui Airport chei ṭhat hi a ṭul tawha ngaiin Mizoram sorkar chuan a kalpui mawp mawp a. Chief Minister ber pawhin ngai pawimawhin hri len vanglai pawhin vawi eng emaw zat a hmunah a tlawh nghe nghe a ni.
Chuti taka hna pawimawh si chu vanduaithlak takin a sak chhiat vangin a chim a, a chim chhan kimchang chhui a ni lo a, contractor leh a viltu engineer lam emaw tumah hrem an ni lo.
Sorkar ngaih pawimawh em em ni si chhan dang vang pawh ni loa sak chhiat vanga chim hi sorkar tan a thinurthlakin a mualphothlak hle a, a chim chhan chhuia a mawhphurtu an hrem mipuiin an rin tehlul nen, tumah hrem an ni lo mai ni loin a chim chhan pawh chhui ṭul an ti lo!
He thil thlenga a chim chhan an chhui lo hi a mak a, heti a nih chuan hnathawh ṭhat loh hi thil pawi lo angin a lang mai ang tih a hlauhawm ta a, 'Engvangin nge Lengpui Airport chim chhan hi an chhui loh?' tih zawhna hi mipuiin an zawt ngei ang.