Sikul neitute an ṭan a ngai

Mizoram State Commission for Protection of Child Rights (MSCPCR) chuan Mizorama sikul leh hostel neitute'n naupang himna atana hma an lak dan a ṭha tawk lo hle tih an puang.

Sikulte hi chhiatrupna thleng thei hrang hrangah a him loa ngaiin kang ṭhelhna hmanruate a awm ṭha lo a, tlan chhuahna tur a ṭha tawk loin sikul building him tawk lo pawh a awm nual. Hostel ṭhenkhatah zirlai an inek beng a, khum insi ṭhupah muin inthiarna thlengin an indaih lo. Hetianga awm hi a thianghlim tawk lo a, chhiatrupna thleng thei lakah pawh a him lo niin an sawi.

Mizorama private sikul neitute hi hripui len hma kha chuan mi awm thei tak tak an ni fur a, sikul din ṭan tir lam ni lo a hlun deuh chinte phei chu mipui vantlang chunga lenga sum leh pai lamah pawh hausa tia chhiar tur an ni hial hlawm ang. Chutihlaiin an eizawnna ber sikul building leh hostel building sak, an infiamna tur hmunhma buatsaih kawngah te beisei an phak loin state pumpuia thlir pawhin kan la hniam hle tih hai rual a ni lo.

Kan chenna in leh kan fate sikul kalna hi a inmil ta lo hle mai a, khawpui lûn lai hmun rem­changa inek beng vak mai, him lo leh hrisel lo tak tak hmuh tur a tam a, a vanduaithlak hle a ni. Hetihlai hian sikul neitu ṭhenkhat, hmun fal leh thengthaw nuam zawk lama insuan chhuak leh inbun ṭan mekte pawh an awm ve bawk a, a lawmawm hle.

Kan rama private sikul neitute an ṭan thar a ngai a, naupangte himna, an hriselna, an infiamna hmunhma leh an riahna hmun ṭha leh him zawk an siamsak a ṭul hle a ni.