Bru chungchangah chet ran a ngai

Mizoram Bru, Tripura-a awmte an awm hlen theihna tura inremna, Union Home Minis­ter hoa siam tawh chu chak taka bawhzuia hma la turin NGO Coordination Committee (Joint NGO) chuan sorkar an phût. 

Kumin January 16 khan New Delhi-ah Union Home minister Amit Shah, Mizoram chief minister Zoramthanga leh Tripura chief minister Biplab Kumar Deb-te hriat­puiin state pa­hniha Bru páwl hrang hrangte leh sorkarin inremna an ziak. Inremna ang chuan, Mizoram aṭanga Tripura-a kal Bru-te chu Tripura-a awm hlen tawh tura tih an ni a; nimahsela tun hnaiah Tripura lamah Bru-te awm hlentir duh lohna a lian thar hle a ni. 

Mizoramin hun rei tak chhung a ngaimawh tawh, sorkar laipui lamin an ngaihven vak loh nia lang chu anmahni duh thua Mizoram aṭanga Tripura lama kal ta Bru-te chungchang hi a ni. Bru lam hian thiam takin Mizorama an him loh avanga tlanchhia nia insawiin raltlan (refugee) angin Tripura-ah an khawsa a, sorkar laipuiin a thlawnin a chawm a, nuamsa takin relief camp-ah an khawsa a ni ber mai. 

Heti chung hian Mizoramah vote an la nei tlat a, Mizoramah inthlan a awm dawn apiangin kan political party lamin an in tlawn siak a, Bru vote hlawm hmuh tumin ṭan an la ṭhin. Political party lam hian Bru an nih leh nih loh lam an thliar lo a, 'vote' an neih miau avangin an vote it avangin a tlawntu zawkah an zuk ṭang fo tih chu tlang hriat a ni. 

Tunah chuan in­remna fel tak awmin Bru-te hi Tripura-a awm hlen tura tih an ni tawh. Chuti a nih chuan Mizorama vote neite hming paih a, Tripura-a an awm hlenna tur lama vote neihtir tur ni tawh awm tak a ni. He inremna hian bawhzui a la hlawh ṭha tawk lo a, inthlan a hnaih leh hma ngeia tihfel a nih theihna turin Mizoram sorkar hian hma a lak a ṭul ta takzet a ni.