Mahni kea din tum

Chief Minister leh MNF President ni bawk chuan Mizoram chu mahni kea dintir an tum thu a sawi a, MNF chu midang ring loa mahnia intodelh tuma independent pawh tum tawh a nih thu leh mahni inchawm tura ngaih an nih thu a sawi.

Mizoram hi India ram state zinga thawh chhuah nei tlem pawl a ni a, thil engkim deuh­thawhah sorkar laipuia innghat a ni ber mai. Kan ei leh in tur takngial pawh kan thawk chhuak lo a, kan kham khawp kan thar loh avangin ramri buai leh hripui len nikhuaah kan buai hle tih kan tawng zo chiah a ni.

Hetihlai hian kan state hotu­pa ber chuan kan ram hi mahni kea dintir an 'tum' thu a sawi a, thil lawmawm tak a ni phawt mai. Mahni kea ding tur chuan thawh chhuah kan neih ve phawt a ngai a, chu mai ni loin midangte'n an lei duh tur kan hralh chhuah a ngai bawk a; chutiang thlentir tur chuan thawhrim a ngai a, a taka thawh a ngai a, sorkar laipui pawisa dil reng renga awm loh hun hi a nghah­hlelhawm reng a ni.

Tunah chuan 'minister chak' tia kan sawite pawh sorkar laipui aṭanga 'dil chhuak thiam' te hi an la ni deuh ber rih. Kan state hotupa sawi anga mahni kea din hi a nghahlelhawm hle a ni.

Kum eng emaw zat sorkarna vawn­fung chelhtua an ṭan tawh hnuah pawh kan ram hi mahni kea dintir 'an tum' tih an la sawi chauh avang hian intodelh hi a harsa hle tih a chiang a; nimahsela tumna a awm chuan kawng a awm an ti a, mahni kea din theih hun i nghak zel phawt mai ang.