Sikul an kai ṭan leh ta

Kum hnih chhung zet Covid-19 hripui leng avangin Mizoramah zirna inte khar a ni tawh a, hmun ṭhenkhatah online class kalpui a nihlaiin thingtlang kilkhawr zawkah te chuan zirna kalpui hleihtheih a ni lo a, kum hnih hnuah sikul hawn a ni leh ta.

Sikul hawn ruala Aizawl khawpuia thil lo lang nghal chu traffic jam a ni a, hei hi chu hripui len hmaa kan tawn ṭhin pangngai tho kha a ni. Kawng chhawng siam emaw, khawpui chhung traffic ruahmanna thar siam emaw a awm lo a nih chuan sikul naupang kal hunlai leh office pisa kai hunah hi chuan traffic jam hi chu a reh tawh dawn lo pawh a ni maithei.

Zirlai tam takin uniform an la nei lo a, zirlaibu lam pawh an la nei kim lo bawk a, inbuatsaihna hun a tlem avangin zirlai lam leh zirtirtute pawh an la inpeih tawk lo deuh a ang. Chuti chung chuan state dangah pawh zirna in an hawn tawh avangin Mizorama zirna in hawn ve rawih mai hi thil lawmawm a ni a, zirlaite zirna piah lamah an nungchang thlenga siamna hmun zirna in hawn hi a ṭul tawh takzet a ni.

Zirlai lam chuan an tih tur tiin sikul an kai ṭan leh ta a, anni enkawl danah hian zirtirtute mawhphurhna a sang dawn hle a ni. Zirlaite hi kum hnih zet sikul kai tawh lo, a tam zawk chu in chhunga inkhung deuh ngat ngat mai, phone leh TV en reng renga hun hmangte an ni dawn a, chutihlaiin enkawlna dawng ṭha loa sikul chawlha ngaia khawlaia leng mai mai tawkte pawh an awm dawn.

Zirlaite ṭha taka lo dawng­sawng a, an zirna leh an rilru lam thlenga na taka nghawngtu hri leng zunzam lak ata chhanchhuak a, kawng dik kawhhmuh turin zirtirtute'n tihtakzeta hna an kalpui a ngai dawn a ni.