Zu hmun ṭhiat thei lo sorkar?

Tun hnaia Central YMA-in ruihhlo do chungchanga inrawn khawmna a buatsaihah Aizawl bul hnai - Phunchawng, Rangvamual leh Tuikhurhlu leh a chhehvelah zu zuar mi 343 an awm thu tarlan a ni. Mizoramah ruihhlo ngai mi 2,600 vel awm anga ngaih a nih bakah ruihhlo zuar mi 340 vel an awma ngaih a ni bawk.

Zu khap burna dan hmanna rama heti taka zu a zalen thei mai hi a khapna dan siamtu lam tan mualphona a ni. Zu kan khap a nih chuan a khap rêm theih em loh pawhin zalen taka zawrh theih loh tur tala thunun chu thil theih a ni.

Zep thu a chêng lo a, sorkar hmasain dan anga zu an zawrh khan tuna sorkarna vawn fung chelhtute hian zu an sorkar chuan zu an khap tur thu an puang a ni. An sorkar ta a, zu zawrh phalna tihtawp a nihlaiin zu erawh a la zalen hle tih hai rual a ni lo.

Sorkar hian zu hi a ngai­mawh a, tihrem a tum a nih tak tak chuan khapna dan siam ringawt hian awmzia a nei lo a, a taka an thawh chhuah a ngai. Sorkar hlimah Minister pakhat aia tamin zu hmuna ngaihte tlawhin thawktute pawh an fuih a, tuna kan dinhmun erawh chu pawisa nei tan zu lei tur a awm reng, tih a ni.

Dan anga zu zawrh titawp thei sorkar kan nei a, he sorkar hian zu khap burna hnuaia khawpui daifema zu hmun tia puh theih khawpa awm hi thianfai thei se; zu khap thei si, zu hmun ṭhiat thei lo sorkar a ni palh ang e.