Smuggling, contract hralh leh MKHC thu

Mizoram Kohhran Hruaitute Committee (MKHC) chuan thuchhuah siamin, smuggling ti lo tur leh duhâmna ṭha lo lakah invéng fimkhur turin ram hruaitute leh mipui an ngen a. Kut tling loa sum lâk luh leh duhâmna laka fimkhur tura mi tin ngenin, “Dan loa ram páwn aṭanga bungraw lâk luh (smuggling) te, hmasawnna ruhrel thawhna leh kawng danga dik lo taka sum siamte hi tu mahin ti lo turin kan ngen a ni,” a ti.

Mizoramah hian mipuiten an thu an zawm leh hun harsa a che chhuak fo ṭhin chu kohhran hruaitute an ni a, ram buai lai aṭang tawhin zah an kai hle a ni. Ṭhahnemngaih luatah duh khawp lohna neia sawisel ṭhinte awm bawk mah se, MKHC thu hi chu sorkar pawhin a ngai pawimawh a, mipui pawhin an la zawm ṭha viau a ni.

Tun hnaia MKHC thuchhuah hi ngun taka kan zir chuan thu khuh tak chung siin vei an nei a, chu chu thawhrim rah ni lo vawi leh khata hausak thutna hi an vei hle tih a lang. Hausak thut theihna tam tak zinga mi ṭhenkhatin an sawi mam, thil dik lo ni pawha an puh phal loh chu ram pawn aṭanga kuhva rah lakluh hi a ni. He smuggling lian tak hi Mizoramah hun rei tak kalpui a nih tawh vang te, ruihhlo leh ralthuam lamte a nih loh avanga mipui tana pawi loa an hriat vang te, sorkar dan zawm chiah lo mah se a hlawk em avangin thil sualah an puh phal meuh lo a ni ber mai.

Nimahsela sumdawnna dang aia hlawk uchuak bîk, a phurtu lirthei man pawh säng bîk, a load leh unload-na kawnga thawktute hlawh pawh säng bîk far mai a nihna aṭang hian a rinhlelhawm tawh a, chhiah pangngai pe loa ram pawn aṭanga dan loa lakluh a nih bawk avang hian thil dik lo a ni. Khawtlanga nghawng ṭha lo tam tak a neih piah lamah Kolasib leh Mamit District lama kuhva chingtu kuthnathawktuten he smuggling hi an tawrh avangin tihtawp ngei a ṭul a ni.

MKHC-in hmasawnna ruhrel hnathawha 'dik lo taka sum siam' a tih hian contract hralh chhawn a kawk thei ang. Tun hnaiah pawh cheng nuai 100 eia inpuhna hial awmin Assembly House-ah pawh khel a ni a, tumah hrem an ni lo hi thil mak tak a ni. Kan ram hruaituten contract hralh ṭhin a nih thu an sawi ngam a, contractor hming lang zawng zawng chu a hmutu an nih kher loh thute hial vantlang hriata an sawi ngam tak avang hian kan ram dinhmun hi a ngaimawhawm reng a ni.

MKHC thil vei zingah smuggling, contract hralh chhawn leh mi hminga contract hna thawh te hian kan ram a luah hneh ta hle a, kohhran thu ngai pawimawha sim hmak theih ni se a ṭha ngawt mai.