Health care-ah mipuiin sawi tur an nei

Health & Family Welfare Board Vice Chairman chuan Mizoram State Health Care Scheme chu MNF bul ṭan leh kalpui a ni a, party dangin sawi tur an neih loh thu tun hnai khan a sawi a; Congress chu MNF bul ṭan sa health care scheme pawh kalpui hleithei loah a puh. Tun hnaia Health Care Scheme hnuaia leiba tam chu Covid-19 hripui avanga sum indaih loh vang a nih thu leh, an rulh vek tur thu a sawi.

Inthlan a hnai a, politician-te pawhin ṭan an la a, mipuiin an rin theihna turin theihtawp an chhuah a, an khingpuite beihna atan ṭawngkam hriam tak takte pawh an hmang chho leh ṭan ta. Hei hi politics kalphung a nih tak deuh ber avang hian a tute pawhin hmang se dem chiam tur a ni lo ang.

Chutihlaiin Mizoram sorkar­in health care scheme a kalpui meka leiba tam lulai lutuk erawh hi chu political party lamin sawi tur an nei lo a nih pawhin mipui chuan sawi tur an nei ngei ang. Mipui­te hian health care-ah hian sum an thawh a, an damloh nikhuaa sorkar sum hmanga puih lêt an nih ve theihna turin an phak ang tawk thawh tura phût an ni.

Mipuiin an tih tur an tih vek tawh hnu, sum senga an inziah luh tawh hnua cheng vaibelchhe 50 chuang mipui damlo mangang pawisa batsak hi chu a fel lo a, bill táng chungchangah mipuiin sawi tur an nei e.