CM an chhui dawn em?

Mizoram Fist Movement (MFM) chuan Lengpui Airport tihchangtlun hna inpek chungchangah dan bawhchhiatna a awma hriain a mawhphurtu Chief Minister chu chhui turin Lokayukta-ah an zualko a. Chief Minister chu thuneihna hmang sual leh chhungkhat laina uchuak taka duhsakah an puh a, hna inpek dawna restricted tender hman danah pawh dan bawhchhiatna awm ngeiin an hria a ni.

Lengpui Airport chei ṭhat hna kalpui a nih dan hian sawi a hlawh hle mai a, tunah chuan Chief Minister meuh an hekna chu Lokayukta-ah a lut ta.

Lokayukta-a thu thehluttute hi mithiam tak takte an nih bakah Chief Secretary kal chhuak ta hial pawh a tel a, ani hi restricted tender hmanga hna an inpeklaia Mizoram sorkara Chief Secretary a ni nghe nghe.

He hna hi vanduaithlak takin a chim hlauh mai a, a chim vanga contractor ban emaw hrem emaw a ni lo pawh hi mi tam takin an sawisel tawh a; chu mai pawh ni loin a hna inpek dan aṭangin a fel lo tawh niin MFM lam chuan an ngai. A hektu lam hi chuan induhsakna uchuak tak hmangin he hna hi pek niin an sawi a; hripui len vanglai tak pawha Chief Minister-in Lengpui Airport a tlawh fo chhan te pawh kha ngaihtuah ila, chhan dang a awm thei ang em?

Lokayukta-ah hekna a lut ta a, Lengpui Airport tihchangtlun hna kalpui mekah hian Mizoram Chief Minister hi chhui a ni dawn em?