Sikul chei ṭhatna sum riral

Bilkhawthlir MSU hruaitute chuan NABARD sum puk hmanga an khuaa sikul chei ṭhat pahnih chu a hna hralh chhawn ve ve a nih thu leh a nih ang tura chei a ni lo tih an puang a, hna hmutu leh an hralh chhawn dante chiang takin an tarlang.

Mizoramah hian ualau taka eiruk a awm a nih ngai chuan contract lei leh hralh chhawn hi eirukna langsar ber pakhat a ni ang a, heti taka kan rama hmasawnna ruhrel tur kan sawp chhe zo hi a pawi hle a ni. Sorkarna vawnfung chelhtu chu tu pawh ni se, an sorkar hun chhungin an party mi leh sate 'duhsakna remchang' tiin contract hna an sem ṭhin a, hei hi kan ram ṭhanmawhbawk pakhat a ni.

Party mi leh sa induhsak hi chu thil thleng fo a ni ang a, chutihlaiin a awm chin thliar a nih loh chuan kan hna pawimawh zawng zawng deuhthawa man ṭang eitu an tam ta lutuk hi a zia lo hle a ni. State ṭhenawm hmun ṭhenkhatah 'corruption hi an kalphungah a bet tlat tawh a' kan tih ang kha kan ni zo ta emaw tih turin kan conrtact hnathawh dan te pawh hi a awm ta a, chu chu kan ram hruaitute hian an pawi ti lo a ang ta hial zawk a ni.

NABARD sum hmanga sikul thuam ṭhatna pawisa hi a puka kan puk, sorkarin a la rulh leh tur a ni. Chutihlaia party mite duhsakna remchang ang mai a chang ta leh, khaw tinah an hnathawh a phuailuai ta lutuk hi a zialo a, School Education Minister khan a sa ṭha lote chu an bill hrensak an nih tur te kha a sawi a, amah pawhin sak ṭhat loh hi a pawm niin a lang thei.

Engpawhnise kan ram hmasawnna tura pawisa lo kal hi thawk ve lo chuan lo pawt pêng tawh lo se, sum riral tam lutuk hi kan tuar mek a nih hi.