Raltlante enkawl zel dan tur

Champhai district Bawrhsap chuan tun hnai khan Myanmar raltlante awmna hmun Mualkawi ram a tlawh a, tunah hian Champhai district chhungah raltlan 8,747 an awm mek tih tarlan a ni. Champhai Bawrhsap chuan, "Raltlan hminga lo kal, kan ram tichhe theite dan hnuaiah nasa taka kan do tlan a ngai," tiin a sawi.

Myanmar ramin politics-a buaina a tawh avangin Mizoramah raltlan tam tham tak an lo lut tawh a, hmun hrang hrangah an awm darh mek a ni. Raltlante awmna tura ruahman rufugee camp-a awm aiin refugee camp ni loa awm an tam zawk niin a lang a, heng mite hian an chhungkhat hnaivaite an bêl a, a ṭhen chu mahnia inbawl hrangte pawh an awm tawh.

Raltlante hi manganga sahimna zawnga lo lut an nih avangin ṭha takin Mizoramin a lo dawngsawng a, sorkar tana chet a remchan lohnaah pawh tlawmngai pawlte'n an lo tuamhlawm zel a, sorkarin a remchan angin a ṭanpui bawk a, mimal leh pawl hrang hrangte'n ṭanpuina an pe bawk a ni.

Hetihlai hian Myanmar aṭanga raltlan anga lo lut zingah thil ṭha lo dang rawn luhpui an awm ṭhin niin sawi a awm a, Champhai Bawrhsap thusawi hian chu chu a nemnghet niin a lang.

He thil ṭha lo do tur hian theihtawp chhuah tlan a ngai a, hetiang thil sual tihna remchanga hmangtute hi a raltlante ngei hian an ngaimawh hle ang tih pawh a rin theih a, kan zavaia ṭang ruala do a ngai a ni.