Kuhva tawlh a la ni fo

Bairabi North-a kudam pakhatah tun hnai khan kuhva rah eng emaw zat hmuh a ni a, Zampuimanga Group YMA chuan Myanmar aṭanga dan loa thawn ni ngeiah ngaiin thuneitute hnenah an thlen. Kuhva rah neitute hian Goods and Service Tax (GST) an pekna document an lo nei a, hetih lai hian, GST document an neih chu kudama kuhva rah dah Zampuimanga Group YMA-in an hmuh hnua siam a ni.

Zampuimanga Group YMA hian February 23, 2022 khan Myanmar aṭanga dan loa lak luh kuhva ro ni ngeia an hriat hi a hmun­ah enin Bairabi SDC hnenah FIR an thehlut a, mahse, SDC chuan Kolasib DC-te nen an inràwn hnuah an kut a nih loh thu Zampuimanga Group YMA hruaitute a hrilh.

April 14, 2022 khan SDC chuan Barabi Police Station officer-in-charge hnenah dan hnuaia a ṭul anga hma la turin a hriattir leh a; nimahsela hetih hunah meuh hi chuan kuhva rah neitute hian way bill pekna tax invoice pahnih an lo nei a, pakhat chu April 12, 2022-a pek chhuah a ni a, pakhat chu April 13, 2022-a pek chhuah a ni.

YMA lamin Myanmar aṭanga dan loa kuhva tawlh ruk tur nia an hriat an man hian sorkar lamin hma la nghal se a ṭhat tehlul nen thuneitu lam an inrawn kual rei deuh a, Bairabi Police-te kutah an dah nghal mai lo a, kuhva rah neituten April 12 leh 13-a document an neih tuk April 14-ah chiah Bairabi Police kutah dah a ni!

He thil hi Mizoram mipuiin an ngaihvenin an ngaimawh hle tih Mizoram sorkar hian hria se, a phenah thil fel lo a awm palh a nih chuan ram mipui zahlohna lian tak a ni ngei ang. YMA-in kuhva rah an man hi sorkarah an hriattir a, SDC leh DC an inrawn rei deuh a, April 14-a Bairabi Police kuta an dah hi chuan way bill pekna document a hma nia siam an lo nei hman tawh a ni.

Myanmar aṭanga kuhva rah ro tawlhah mi challang leh thiltithei an inrawlh tih thuthang awm te, Assam lama kuhva rah tawlhtu leh kan state hotu lianten zanriah an kilho tihte an sawi hnua he thil a lo thleng leh zel hian ngaihtuah a tithui. Engpawhnise a YMA lam tal hi thil awm dan chhui chhuak turin ke pen zui zel se a ṭha ang.