Ramri bula kawng laihna senso

Kolasib DC office lamin an tarlan danin Assam ramri depa kawng (Link road) siam nan sorkarin cheng nuai 1900 vel a hmang ral a; ZPM Ṭhalaite chuan kilometre 70-a thui kawngpui laihna atana senso tam lutuk chu thil ni theiah ngai loin a bialtu MLA chu insawifiah ngei turin an phût a ni.

Mi ṭhahmen­ngaiten RTI Act hmanga thil an zawh fiahin chhan­na mak tak tak leh chhan theih loh pawimawh tak tak si te a awm nual a, kawngpui laihna atana khawl an hman dan darkar zatte pawh an chhang thei lo a, hei hi thil pawi tak a ni.

Ramri ngaihtuah leh ramri chhehvela hmalaknaah chuan Congress aiin MNF lam hian fak an hlawh zawk niin a lang a, chutihlaiin an hmingṭhatna tura sum leh pai bo thlau tam tak awm nia lang hi MNF tan pawh lungawilohna tur tham a tling hial awm e. Sorkar hotu lu aṭanga ṭha taka an tih tawh, sum indaih lo chung chung pawha sum an pek chhuah tawh hnua kawngpui an laih zat leh a senso inmil lo lutuk hi chu chhui chian ngei a ṭha khawp mai.

Mizorama thil pawi em em mai chu hmasawnna ruhrel siam dawna man ṭang eitu an lo awm zel hi a ni. Tun ṭumah hian sorkar official-te ni lo tlawmngai pawl hrang hrang hruaitute'n an vil chung pawha rinhlelh tur thil a awm hi a pawi takzet a, bialtu MLA pawh hi thil awm dan hre chiang thei tur a ni a, mipuiah thil awm dan dik tak an puan thuai loh chuan he thu hian kum 2023 inthlan dawn thleng a daih palh ang tih hlauhawm tak a ni.