Insumdawn tawnna mumal lo nghawng

International Trade Initiative Forum (ITIF), Mizoram chuan India leh Myanmar ramri, a bikin Zokhawthar Land Custom Station-a insumdawn tawnna chu a nih dan tur anga kalpui thuai turin Prime Minister an ngen a, tun hnai khan lehkha an thehlut.

India leh Myan­mar hian Zokhaw­thar kaltlang hian a hming lekin sum­dawnna a kalpui a, hetihlai hian dan loa sumdawnna hi lian tham taka kalpui reng tho a ni. Dan loa sum­dawnna han tih hian a inang lo hle a, ralthuam leh ruihhlo tawlh ruk te, rangkachang leh thil hlu dang tawlh ruk te, nitin mamawh leh thawmhnawte bakah hlawm lian taka kuhva hring tawlh ruk leh thil dangte pawh a tel ang.

Tunah hi chuan sorkar laipui hian Zokhawthar kal­tlanga dan anga insumdawn tawnna lam hi an tichangtlung duh si lo a, he kawngpui kal tlanga insumdawn tawnna endiktu tur official a dahte an beithamin an chak tawk lo bawk si nen, tunah hi chuan dan loa insumdawn tawnna hmunpuiah a chhuak ta a ni deuh ber mai - chumi tichiangtu ber pakhat chu dan loa kuhva raha sumdawngte'n kawngpui an dai chhe hial an tih hi a ni thei awm e.

Hemi kawngah hian kan state sorkar pawhin tih theih a nei a, kan MP-te pawhin tih tur an nei ve ang. Tun anga a hming maia Land Custom Station neih a, dan loa sumdawnna hmunpui ang maia thil a kal hi chu a fuh lo takzet a ni.