Bairabi-a kuhva rah manin ngaihsaktu a nei lo em ni?

Bairabi-a kudam pakhatah tun hnai khan Myanmar aṭanga kuhva rah tawlh ruk nia rin ṭhahnem tham tak a awm tih hriat a ni a, Zampuimanga Group YMA-te chuan man ṭha tiin FIR an thehlut. Hemi hnu hian sorkar thuneitute an inrawn kual a, Mizoram Police lam chuan an bawhzui turah ngai loin Aizawla Customs hotute hnenah an thil awm dan an hriattir a ni.

Sorkar hian dan fel tak neiin thil kalphung hi siam fel sa a nei a, police-in an man leh buaipui tur chinte a awm ang bawkin Customs official lam bawhzui tur chite a awm hrang.

Tun hnaia kuhva rah ro pawh hi ram pawn aṭanga a ruka lakluh niin a lang a, police lam bawhzui zel tur ni loin Customs lamin an bawhzui tur chi a nih avangin Mizoram Police lam chuan kut an sil ta a ni deuh ber.

Dan loa tawlh ruk nia hriat kuhva rah a awm tih YMA lamin an hmuhchhuah hian a neitute hian GST pekna document an la nei lo a; nimahsela sorkar thuneitu lamin bawhzui tura Bairabi Police Station an hriattir meuh hi chuan GST pekna hi an lo nei fel hman chiah a ni.

Tunah chuan kuhva rah tawlh­tute'n GST pekna lehkha pawimawh an nei fel tawh a, Mizoram Police lam lahin Customs lam kut a ni tiin an hriattir ve leh tawh bawk a, a tira mantu YMA lam beisei dan nen chuan thil kal dan hi a inpersan tawh viau mai thei.

He thil kal kual dan hi ngun taka ngaihtuah chuan kuhva rah neitute tan chuan thil lawmawm tak a nih hmel a, a tawp dan tur hriat a chakawm tawh hle a ni.