Sum dinhmun ziaawm thei se

Mizoram sorkara Finance Commissioner chuan Covid-19 dinhmun a ziaawm chho a, sorkar laipuiin chhiah a hmuh tur ang a hmu thei a nih chuan Mizoram sorkar sum dinhmun a ṭhat zel an beisei thu a sawi.

Hun rei tak chhung Mizoram sorkar hruaitute sawi tawh chu hripui leng avanga sum harsatna thleng hi a ni a, hei hian kan ram hi nasa takin a nghawng niin a lang.

Hetihlai mêk hian thawh chhuah nei lo leh sum hlawm lian lakluhna nei lo state kan nih avang hian hripui leng lo pawh ni se sumah hian kan harsa tho mai thei bawk a, tun dinhmunah hi chuan kan sorkar hi sumah a harsa hle niin a lang.

Budget pawm takah khan sorkar department tam zawk chuan hnathawhna tur sum an nei lo a ni ber a, sorkar hnathawkte hlawh pawh an inpe kim thei lo ang tih hlauhawm khawp a ni a, kan sum dinhmun a ṭhat tawk loh vang a ni.

Chutihlaiin kan Budget kalphung kha ngun taka thlir chuan Finance Minister aṭanga dil chhuah chawp tur sum ṭhahnem tak dah a ni bawk a, a dil chhuak thiam leh Finance Minister-in ṭul nia a hriatah chuan hman tur a awm hmel.

Sorkarin sum leh paia harsatna a tawh hian a tuartu chu sorkar aṭanga direct-a pawisa dawng lem lo miretheite hi an ni tel a, a state pumin sorkar sum bawm kan inzen rawn avang hian sorkar chak leh thiltithei mamawhna hi a säng hle a ni.

Tunah hian hma­sawnna hna­thawhna leiba a tam hle a, damlo mangangte health care bill thlengin a táng tawh a, sorkar hnathawk pension pawisa la thei lo tam tak an awm mêk bawk. Hengte hi kan sorkar sum a ziaawm deuh chuan tluang takin a kal chho thei turah i beisei ang.