Khaw chhak aṭanga ruihhlo lo lut tur do turin Myanmar unaute nen ṭan rual a pawimawh

Myanmar rama Zo hnahthlak pawl paruk - Chin National Front, Chin National Organisation, Hualngoram People Organisation, People Defence Army, People’s Defence Force - Kalay leh Zomi Federal Union-te chuan thuchhuah inṭâwm siamin, Myanmar aṭanga sahimna zawnga Mizoram pantu zingah ruihhlo tawlh an awm a nih chuan sim nghal hmak turin an hriattir.

Myanmar ram abuai avanga sahimna zawnga  Mizorama lo lut zingah ruihhlo tawlh ru an awm niin sawi a awm a, hei hian Myanmar-a Zo hnahthlak unaute beng a thleng a, "Kan sahim nana Zo fate Jerusalem pan khawmtute zingah hetiang tih chíng kan awm a nih chuan sim nghal hmak tur leh hetiang thil a awm tawh loh nan theihtawp kan chhuah dawn," an ti a, a lawmawm hle a ni.

Ruihhlo do tur hian ram pahniha mite kan ṭan rual a ṭul takzet a, Myanmar-a hnam dangte'n min ṭan rualpui ṭha tawk lo a nih pawhin a Zo hnahthlak chin tal kan ṭan rual ṭhat chuan ruihhlo do hian awmzia a nei thui thei ang. Myanmar lam mi ruihhlo tawlh man an nih hian Zo hnahthlak zinga mi an ni deuh vek a, hei hian ram pahniha Zo hnahthlak pawlte thawhho ṭhat a ṭulzia a tilang thei nghal awm e.

Refugee zingah ruihhlo tawlh an lo awm ve a nih pawhin an tam kher lo ang a, an sim ngei a ṭul a; chutih rualin refugee ni ve lem lo, tun hma aṭanga Mizorama ruihhlo tawlh ṭhinte pawh zawng chhuakin Myanmar lama kan unaute hian ṭan lo la thei se a lawmawm ngawt ang.