Eiruk leh Mizoram

Siaha Deputy Commissioner hlui IAS officer pakhat chu sorkar sum nuai 42 eiru-ah puh a ni a; Siaha DC Pisa hnuaiah eirûkna a awm ngei nia hriain amah thlaktu Bawrhsap tharin Chief Vigilance Officer (CVO) hnenah a thlen a; CVO chuan Siaha DC thu thlente chu a zir chian hnuah chhui zui turin Anti Corruption Bureau (ACB) a hriattir a ni.

He thil thleng hi mipui nawlpuiin kan hriatpui vak loh thil a ni mai thei a, nimahsela a hnathawhnaa amah thlaktu ngei­in National High­way zauhna leh Truelab Quattro lei chungchangah thil fel lo a awm tih hmù chhuakin a hek ta niin a lang.

Hetiang hian kan sorkar officer ṭhenkhat hi an hnu chhui zel thei se, kan rama sorkar hnathawk ṭhenkhat hausak dan aṭanga en mai hi chuan hei aia lian zawk eirukna chhui chhuah tur a awm ngei dâwn niin a lang.

Tun ṭuma mi IAS officer hi hnam dang niin tunah Mizo­ramah a awm tawh lo a, hetia thubuai thehluh a nih tâk hnuah hian amah hian Mizo­ram sorkar a khing let nghe nghe a ni.

Kawngpui siam chung changah bawk hian Mizoram politics titi lian tak tling phak, eptu lamin Assembly House-a rorelna pawimawh an chhuahsan hial chhan Ngaizawl khaw kawng laihnaa cheng nuai 100 eia inpuhna kha engtin nge a kal tâk zel hriat a chakawm a. A puha-te pawh khan thu dik hai lanna turin a puhtu lam hi khing let ve ngam se, kawngpui siamna tur cheng nuai 100 pawh pen a nih leh nih loh hi dan hmaah tal finfiah theih ni se a ṭha hle a ni.

Mizoram ṭhan­mawhbawk lian tak pakhat chu contract lei leh hralh hi a ni a. Hei hi eirukna ualau leh langsar tak a ni a, dan bawhchhiatna a ni chung hian ngaiah kan nei ta a ni deuh ber mai. Hetianga kan ram hmasawnna tur tihriral hi eirukna (corruption) chi khat a ni tih mipui hian kan hriat a ṭha ngawt mai.