Kuhva rah tawlhruk phenah tunge awm?

Zampuimanga Group YMA chuan Bairabi-a kuhva rah tawlh ruk tur an man tawh hnu rel-a phurh a nih dan te, thuneitu lam an chet muan avang leh hmalakna mumal awma an hriat loh avangin an thiam anga hmalak an tum.

Myanmar aṭanga dan loa kuhva phurh luh chungchangah Champhai lamah buai hat a awm tawh bawk a, Champhai DC lakah FIR an thehlut hial tih kan la hre awm e. Champhai NGO lamin kuhva tawlhruk an duh loh thu an aupui fo tawh a, kawng an zawh tawh a, smuggler-te inluling lutuk an duh loh thute hial an au chhuahpui tawh a ni.

Hetihlaia kuhva tawlhrukin awlsam taka police gate a kal tlang reng maite hian mipui ngaih a tiṭha lo a; Assam lama kuhva smuggler tia an man kan state lama a tlangnel viau mai nia a langte leh kan state hotute nen an inhria te hi sawi zui loh a harsa hle.

Engpawhnise tunah Bairabi YMA-in kuhva tawlhruk ni ngeia lang an man a, an man tawh bera hnu khawih chet theih loha awm tur ni awm tak an lo phur chhuak lehzel a. Mi man tawh sa vek pawh an la phur chhuak thei a nih chuan lirtheia an phurhlai man chu thil harsa tak a nih zawk hmel.

Engpawhnise kuhva rah tawlh­ruknaah hian pawisa che vel a tam em avang hian a man pawh a harsa a ni thei a; kan ram ngeia thil thleng a ni si hian lung a tiawi lo takzet tawh a ni.