Bangladesh nena insumdawn tawn

Bangladesh Commerce Minister chu Mizoramah lo zinin Banglandesh leh Mizoram insumdawn tawn theih dante a rawn zir chiang a, Mizoram sorkar pawhin kawng hrang hranga insumdawn tawn theih an duh thu leh a theih dante an lo hrilh bawk a, inbiakna ṭha tak an nei.

Mizoram hian Myanmar leh Bangladesh nen ramri thui tak a nei a, hei hi sumdawnnaah awmze nei takah chantir a nih ngat chuan state rethei ber pawl hi kan ni kumkhua bik lo ang.

Tunah hi chuan ṭhen­awm state-te nena awmze nei thama insumdawn tawnna hi kan la kalpui thei lo a, kan hotute'n sumdawnna lam an ngaihtuah thleng ta hi thil lawmawm tak a ni.

Hetihlai hian ram leh ram insumdawn tawnnaah hian state-in a tih theih loh chin tam tak a awm a, sorkar laipui lamin a enkawl leh a kaihhruaina hnuaia kalpui thil thui tui tak a awm. He mi hrethiam chung hian kan state-in kan ṭhatpui theih dan tur ngaihtuah telin kan hotute hian hma an la zel ang tih i beisei ang.

Engpawhnise ṭhenawm ram sorkar hotute hi an lo zin zauh zauh tawh a, beiseina sang tak nen kan thlir ṭhin a, beisei ang thil erawh a chhuak lo fo.

Tun ṭuma Bangladesh Commerce Minister lo zin hian an ram leh kan state insumdawn tawnna turah awmze neiin rah ṭha chhuah ngei se a lawmawm ngawt ang.