Kan politician-te thu inchuh
MNF adviser leh Minister of State ni bawkin, 'Central sorkarin Mizoram BJP aiin MNF sorkar a duhsak zawk' tia a sawi chu Mizoram BJP-in an chhang a. MNF chu BJP-a inleh dan ze danglam khel mekah an puh a, MNF sorkara minister-te chu BJP kaihhruai central minister-te hmuh tuma airport-ah leh an thlenna thlenga thlan tla hluama um ṭhin an nih thu an sawi ve thung.
Kan political party pahnihte inbeihna aṭanga lang chiang tak mai chu he state hi a intodelh lo a, thawh chhuah sawi tham a nei lo a, sorkar laipui chawmhlawm a nih avangin sorkar laipui tlawn thiam a mamawh hle, tih a ni. Kan state minister-te meuhin, "Anni aiin keini min duhsak zawk" ti zawnga vote an la zawn dan aṭang hian kan nihna dik tak chu a hmuh theih.
A BJP Mizoram lam pawhin MNF bei letin kum 2023 inthlanpui chu MNF-in an huphurh em avangin Narendra Modi sorkar tlawn leh fakin tuna BJP, Mizoram hruaitute dinhmun luahlan tumin an bei mek, tiin an puh bawk a. Kan ram hi tute puihna emaw tel lo chuan a kal thei lo a, min pui theitu an nih dawn phawt chuan kan thiam ang angin kan tlawn tlang niin a lang.
Ram a ni emaw, state-ah pawh ni se politician-te thu khel leh an thu inchuh aṭang hian an dinhmun awm tawk hi a thlir theih mai ṭhin.
Tunah hi chuan kan politician-te hian sorkar laipui tlawn lo thei lo dinhmunah min dah mek a, anni tlawn thiam hi hruaitu ṭha angah kan lantir ta bawk a ang hle a ni.