Zirlaite tán Zo Nun
School Education Minister chuan academic session kal mekah pawl 6-8 zirlaite tán an subject pakhatah Zo Nun tih telh a nih thu a sawi a, additional subject anga kalpui tur a ni. Zo Nun buah hian Mizo nuna entawntlak, Mizo mi chhuanawm te, Mizo thuam leh thil pawimawh dangte dah a ni.
Zirlaite tana Mizo nun ze mawi zirna ruahman a ni ta hi thil lawmawm tak a ni a, hei hian rah ṭha tak a chhuah ngei ang tih a rin theih.
Hnam tin hian zirtirna hrang hrang kan nei ṭheuh a, hei hi kan chhawm nun zel loh chuan hnam dang zirtirnain zawi zawiin min chim zel a, kan hnam nun hi kan hloh tial tial ṭhin a, hei vang hian Zo Nun hi zirlaite nun kawng hruaitu pawimawh tak a ni thei ang.
Mahni hnam kan ngaihsan a, kan hnam tih dan leh kan hnamah rinna kan nghah ngam hi a pawimawh takzet a, chumi kawngah chuan tun hmaa Mizo pi pute ngaihsanawmzia in zirtir thar leh hi a pawimawh a ni. Chutiang bawk chuan tuna kan ram hruaitute hian an nun an uluk a ṭul hle bawk.
Ram hruaitu rinawm, dawt sawi ngai lo, nungchang mawi, hlep ru duh lo, sum leh paia rinawm, intodelhna kawnga ram kaihruai thei entawn tur hi a takin hmù se zirlaite hian an ṭhatpui hlein a rinawm.
School Education Department-in zirlaite tana Zo Nun zirlaibu an chhawp chhuak hi thil lawmawm tak a ni a, Mizo hnam kal zel tur atan a pawimawh takzet a ni.